ဇင်ဘာလ ၁၅ ရက်နေ့တွင် ကွမ်ရှီးတက္ကသိုလ် နိုင်ငံတကာ ကျောင်းသား AI သုတေသန စခန်း ကို တရားဝင် ဖွင့်လှစ်ခဲ့ပါသည်။ ဖွင့်ပွဲအခမ်းအနားသို့ ကွမ်ရှီးတက္ကသိုလ်ပါမောက္ခချုပ် ရှောင်ကျန်းကျွမ် (Xiao Jianzhuang)၊ ဗီယက်နမ် အမျိုးသားတက္ကသိုလ် (ဟနွိုင်း) ပူးပေါင်းဆောင်ရွက်ရေးနှင့် ဖွံ့ဖြိုးရေးဌာန ဒုတိယအကြီးအကဲ၊ ကိုယ်စားလှယ်အဖွဲ့ ခေါင်းဆောင် ငွင်ထရုန်ဟီယင် (Nguyen Trung Hien) တို့ တက်ရောက်ကာ မိန့်ခွန်းများ ပြောကြားခဲ့ကြပါသည်။ ထို့အပြင် ဗီယက်နမ် အမျိုးသားတက္ကသိုလ် (ဟနွိုင်း) လူငယ်လိဂ် ကော်မတီ အတွင်းရေးမှူး ဟိုသန်ဟိုဝါ (Hồ Thanh Hoa) လည်း အခမ်းအနားသို့ တက်ရောက်ခဲ့ပါသည်။

ရှောင်ကျန်းကျွမ်က နိုင်ငံအသီးသီးမှ လာရောက်သည့် ဆရာ၊ ဆရာမများနှင့် ကျောင်းသားများကို နွေးထွေးစွာ ကြိုဆိုကာ ကွမ်ရှီးတက္ကသိုလ်၏ ပညာရေးအခြေအနေ၊ အတုမရှိသော AI နယ်ပယ်ဆိုင်ရာ အားသာချက်များ နှင့် “အာဆီယံနှင့် နက်ရှိုင်းစွာ ချိတ်ဆက်ကာ ကမ္ဘာသို့ ဖွင့်လှစ်ခြင်း” ဟူသော နိုင်ငံတကာဖွံ့ဖြိုးရေး မဟာဗျူဟာ ကို အကျဉ်းချုပ် မိတ်ဆက်ခဲ့ပါသည်။ အာဆီယံနိုင်ငံများနှင့် ပူးပေါင်းဆောင်ရွက်မှုကို နက်ရှိုင်းစေခြင်းသည် ခေတ်အလားအလာနှင့် ကိုက်ညီသည့် မလွဲမသွေ ရွေးချယ်မှု ဖြစ်ပြီး၊ “အပြန်အလှန်ချစ်ကြည်ရေး၊ စစ်မှန်မှု၊ အကျိုးတူ၊ ပါဝင်မှု” ဟူသော အိမ်နီးချင်းနိုင်ငံရေး အယူအဆ၏ အသက်ဝင်လှုပ်ရှားသည့် လက်တွေ့ကျင့်သုံးမှုတစ်ရပ် ဖြစ်ကြောင်းကို အလေးထားပြောကြားခဲ့ပါသည်။ ကွမ်ရှီးတက္ကသိုလ်အနေဖြင့် အာဆီယံနိုင်ငံများရှိ တက္ကသိုလ်များနှင့် ပိုမိုကျယ်ပြန့်သော နယ်ပယ်များ၊ ပိုမိုမြင့်မားသော အဆင့်များတွင် ပူးပေါင်းဆောင်ရွက်မှုကို တိုးချဲ့ရန် ဆန္ဒရှိကြောင်း ပြောကြားခဲ့ပြီး၊ တရုတ်–အာဆီယံ မျှဝေမည့် အနာဂတ် အသိုက်အဝန်း တည်ဆောက်ရေးအတွက် ဉာဏ်ပညာနှင့် အင်အား ပံ့ပိုးပေးရန် ကတိပြုခဲ့ပါသည်။

ဤသုတေသနစခန်းသည် နိုင်ငံအသီးသီးမှ ဆရာ၊ ကျောင်းသားများအတွက် တရုတ်နိုင်ငံရှိ AI နည်းပညာ ဖွံ့ဖြိုးတိုးတက်မှုနှင့် အသုံးချမှုများကို နက်ရှိုင်းစွာ နားလည်သိရှိနိုင်ရန်၊ တရုတ်ယဉ်ကျေးမှု၏ အလှတရားကို ကိုယ်တိုင်တွေ့ကြုံခံစားနိုင်ရန် နှင့် လူငယ်များအကြား အပြန်အလှန် နားလည်မှုကို မြှင့်တင်ရန် ရည်ရွယ်ထားကြောင်းကိုလည်း ဖော်ပြခဲ့ပါသည်။ ပါဝင်သည့် လူငယ်များအနေဖြင့် ကြိုးစားသင်ယူသူများ၊ ယဉ်ကျေးမှုအပြန်အလှန် လေ့လာမှုကို ဖြန့်ဝေသူများ၊ ရေရှည် ချစ်ကြည်ရေးကို လက်တွေ့ဆောင်ရွက်သူများ ဖြစ်လာကြရန် မျှော်လင့်ကြောင်းနှင့် ဒေသဆိုင်ရာ ဖွံ့ဖြိုးရေးအတွက် လူငယ်အင်အားကို ပူးပေါင်း ပံ့ပိုးပေးကြရန် တိုက်တွန်းခဲ့ပါသည်။

ငွင်ထရုန်ဟီယင်က ၂၀၂၅ ခုနှစ်သည် တရုတ်–ဗီယက်နမ် သံတမန်ဆက်ဆံရေး တည်ထောင်မှု ၇၅ နှစ်မြောက် နှစ်ပတ်လည်ဖြစ်ပြီး “တရုတ်–ဗီယက်နမ် ပြည်သူချင်းနှင့် ယဉ်ကျေးမှု လဲလှယ်ရေးနှစ်” ဖြစ်ကြောင်း ပြောကြားခဲ့ပါသည်။ AI သည် ကမ္ဘာလုံးဆိုင်ရာ ပုံသဏ္ဌာန်ကို လျင်မြန်စွာ ပြောင်းလဲနေသော ယနေ့ခေတ်တွင် AI ကဲ့သို့သော ခေတ်ရှေ့ပြေး နယ်ပယ်တွင် ပူးပေါင်းဆောင်ရွက်ကာ တက္ကသိုလ် လူငယ်များကို စုစည်းလေ့လာ လဲလှယ်စေခြင်းသည် ဤအရေးပါသော အချိန်အခါကို ဂုဏ်ပြုရန် အကောင်းဆုံးနည်းလမ်း ဖြစ်ကြောင်း အလေးထားပြောကြားခဲ့ပါသည်။ ပါဝင်သူများအား အပြည့်အဝ ပါဝင်လှုပ်ရှားကြရန်၊ တက်ကြွစွာ ပေါင်းစည်းဆောင်ရွက်ကြရန်၊ ဆက်လက် ရှာဖွေ ဆန်းသစ်ကြရန် နှင့် နိုင်ငံနယ်နိမိတ်များကို ကျော်လွန်သည့် “ချစ်ကြည်ရေးတံတား” ကို ပူးပေါင်းတည်ဆောက်ကြရန် တိုက်တွန်းခဲ့ပါသည်။ ထို့အပြင် ပါဝင်သူတိုင်း အကျိုးရှိသော သင်ယူမှုများနှင့် အတွေ့အကြုံများကို ရရှိနိုင်ကြရန် ဆုတောင်းခဲ့ပါသည်။

ကျောင်းသားကိုယ်စား ဟနွိုင်း အဖွင့်တက္ကသိုလ်မှ ချူလန်ဟွန်း (Chu Lan Huong) က AI သုတေသနစခန်းကို စီစဉ်ပေးခဲ့သည့် ကွမ်ရှီးတက္ကသိုလ်အား ကျေးဇူးတင်ကြောင်း ဖော်ပြခဲ့ပါသည်။ သူမက ယင်းစခန်းသည် သင်တန်းတစ်ခု သို့မဟုတ် ဆွေးနွေးပွဲတစ်ခုသာ မကဘဲ နည်းပညာ၊ ယဉ်ကျေးမှုနှင့် ပူးပေါင်းစိတ်ဓာတ်တို့ဖြင့် တည်ဆောက်ထားသည့် တံတားတစ်စင်း ဖြစ်ကြောင်း၊ နိုင်ငံအသီးသီးမှ လူငယ်များအတွက် အတူတကွ သင်ယူရန်၊ အမြင်ချင်း ဖလှယ်ရန်နှင့် အနာဂတ်ဖွံ့ဖြိုးရေးကို အတူတကွ ရှာဖွေရန် အရေးပါသော ပလက်ဖောင်းတစ်ခု ဖြစ်ကြောင်း ပြောကြားခဲ့ပါသည်။ သူမက AI နယ်ပယ်၏ ရှေ့တန်းနယ်ပယ်များကို အခြားနိုင်ငံများမှ သူငယ်ချင်းများနှင့်အတူ ကြိုးစားလေ့လာ ဆန်းသစ်ရှာဖွေမည် ဟု ကတိပြုခဲ့ပါသည်။

AI ကို အဓိကအကြောင်းအရာအဖြစ်ထားသည့် ယခု သုတေသနစခန်းတွင် သီအိုရီနှင့် လက်တွေ့ကို တပြိုင်နက်တည်း အလေးထား လေ့လာစေပြီး၊ AI အကြောင်းအရာသင်တန်းများ၊ အစိမ်းရောင် အီကိုလိုဂျီ သုတေသန၊ ယဉ်ကျေးမှုမျိုးစုံ အတွေ့အကြုံများ၊ ဘာသာစကား စွမ်းရည် မြှင့်တင်သင်တန်းများ စသည့် စနစ်တကျ ဒီဇိုင်းဆွဲထားသော သင်ကြားမှုများ ပါဝင်ပါသည်။ စခန်းတွင် ဗီယက်နမ် အမျိုးသားတက္ကသိုလ် (ဟနွိုင်း) နှင့် ချိတ်ဆက်တက္ကသိုလ်များ၊ ဟနွိုင်း ဆောက်လုပ်ရေးတက္ကသိုလ်၊ ဟနွိုင်း အဖွင့်တက္ကသိုလ်၊ ငဲအန်တက္ကသိုလ်၊ မလေးရှားနိုင်ငံ Universiti Kebangsaan Malaysia၊ Universiti Teknologi MARA နှင့် ထိုင်းနိုင်ငံ Suan Dusit University တို့မှ ဆရာ၊ ကျောင်းသား ၈၃ ဦး နှင့် ကွမ်ရှီးတက္ကသိုလ်မှ နိုင်ငံတကာ ကျောင်းသား ၅၀ ဦး ပါဝင်ခဲ့ကြပါသည်။